ManeHblog-ը ՆԵՐԿԱ ԳՏՆՎԵՑ «YEREVAN SPRING RUN» ԲԱՐԵԳՈՐԾԱԿԱՆ ՎԱԶՔԻՆ

Այսօր Հրազդանի կիրճում տեղի ունեցավ «Yerevan Spring Run» 2016 բարեգործական վազքը , որը կազմակերպվել էր «Հայ մայրեր» բարեգործական հասարակական կազմակերպության և Երևանի կիսամարաթոնի թիմի կողմից, ինչպես նաև մի շարք հովանավորների աջակցությամբ:
Նշենք, որ բարեգործական հիմք ունեցող մրցավազքի նպատակը զինվորական հայրիկներ ունեցող ուղեղային կաթվածով 11 երեխային օգնելն էր:

Մրցավազքին ներկա էին բոլորիս կողմից սիրված երգիչ Արամ MP3-ին, հաղորդավար, տաղանդավոր դերասան Մկրտիչ Արզումանյանը, ինչպես նաև այլ երկրներից ժամանած վազորդներ:

ManeHblog-ը ևս ներկա գտնվեց «Yerevan Spring Run»-ին և զրուցեց «Հայ մայրեր» բարեգործական ՀԿ-ի նախագահ Նարինե Մանուկյանի հետ, ով նշեց, որ արդեն 3-րդ տարին է, ինչ կազմակերպում են բարեգործական վազքը, միայն թե այս տարի նրանց միացան նաև Երևանի կիսամարաթոնի թիմը՝ ի դեմս Անահիտ Ադամյանի:

«Շնորհակալ եմ բոլոր նրանց, ովքեր միշտ մեր կողքին են և պատրաստ են աջակցել՝ «Կիլիկա» կապիտալ ընկերություն, «Barry» ընկերությունը, , որը ներմուծում է բժշկական սարքավորումներ, «Sastex» ընկերությունն իր շապիկներով, «Ջերմուկ» ընկերությունն իր baby բյուրեղ ջրով, «Cilicia Capital» -ը , «Orange Fitness» -ը, Երևանի քաղաքապետարանը, «My food» ռեստորանը, «Ice Express» պաղպաղակը, Նելլի Էլլադան իր թխվածքաբլիթներով, իսկ բարձր տրամադրությունն ապահովեց DJ Elf Artur-ը »,- ասաց ՀԿ-ի նախագահը և ավելացրեց, որ այսօրվա հավաքված հասույթը կտրամադրվի «Հայ մայրեր» բարեգործական ՀԿ անդամ 11 ընտանիքի, որոնց հայրերը կանգնած են սահմանին և ծառայում են Հայաստանի բանակին, իսկ նրանց մանկական ուղեղային կաթվածով հաշմանդամություն ունեցող փոքրիկներն ունեն անհետաձգելի կարիքներ:

Իր հերթին, բարեգործ վազորդների թիմի համակարգող Հայկ Դավեյանը նշեց, որ այս միջոցառումն իր նախադեպերն է ունեցել դեռևս 2014-2015թթ և այս օրվանից սկսած իրենք սկսում են բարեգործ վազորդների նախագիծը:

«Մենք հավաքում ենք վազորդների, ովքեր ցանկություն ունեն վազելու իրենց երկրում և առաջարկում ենք միանալ բարեգործական ակցիային, որի նպատակն է «Հայ մայրեր» բարեգործական ՀԿ-ի խնամքի տակ գտնվող ՄՈՒԿ-ով երեխաների համար վերականգնողական կենտրոն կառուցելը»-նշեց Հայկը:

ManeH-ի հետ զրուցեց նաև սիրված դերասան Մկրտիչ Արզումանյանն ու ասաց, որ շատ ուրախ է այս նախագծի համար:

«Ողջունելի է, որ կա նման նախագիծ, որի շնորհիվ կարող ենք ինչ-որ կերպ օգնել երեխաներին: Արդեն մտածում եմ, որ մյուս տարի ես նույնպես կմիանամ վազքին»,- ասաց դերասանն, ով այսօր հանդես եկավ որպես հաղորդավար:

Վերջում, «Run Yerevan» –ի հիմնադիր, նախաձեռնող և հովանավոր Տիգրան Մամիկոնյանը հույս հայտնեց, որ այսօրվա միջոցառման շրջանակներում բարեգործության համար հավաքված հասույթի շնորհիվ կկարողանան օգնել երեխաներին:

«Ուրախ եմ, որ տարեցտարի և՛ վազորդների, և՛ հովանավորների թիվը ավելանում է և հույս ունեմ, որ մեր սկսած գործը դեռ երկար տարիներ կշարունակվի»,-նշեց Տիգրան Մամիկոնյանը:

Դե ինչ, ManeHblog-ը աշխարհի բոլոր փոքրիկներին մաղթում է առողջություն և առաջարկում դիտել «Yerevan Spring Run»-ի լուսանկարները:
ManeH