ԵՐԵԿ, ԱՅՍՕՐ, ՀԱՎԵՐԺ … ՏԵՂԻ ՈՒՆԵՑԱՎ ՄԱԵՍՏՐՈ ԱՐԹՈՒՐ ԳՐԻԳՈՐՅԱՆԻ ՀԵՂԻՆԱԿԱՅԻՆ ԵՐԵԿՈՆ

Երեկ, այսօր, հավերժ…

Երեկ Կարեն Դեմիրճյանի անվան մարզահամերգային համալիրում տեղի ունեցավ սպասված հեղինակային երեկոն, որը նվիրված էր մաեստրո Արթուր Գրիգորյանին: Մաեստրոյի տարբեր տարիների երգերը հնչեցին նոր ու թարմ շնչով՝ իր սերունդների ձայնով: Համերգն ուղեկցվեց Հայաստանի պետական սիմֆոնիկ նվագախմբի նվագակցությամբ:

Արթուր Գրիգորյան (Արտաշես Գրիգորի Գրիգորյան) հայ կոմպոզիտոր, ՀՀ ժողովրդական արտիստ (2011)։

Սովորել է Երևանի Տիգրան Չուխաճյանի անվան երաժշտական դպրոցի դաշնամուրային, այնուհետև՝ կոմպոզիցիայի դասարանում, 1975-1979 թվականներին՝ Երևանի Ռ. Մելիքյանի անվան երաժշտական ուսումնարանում։ 1981-1983 թվականներին և 1987 թվականից դասավանդել է «Հայհամերգ» էստրադային ստուդիայում։ 1983-1984 թվականներին աշխատել է Գեղագիտության ազգային կենտրոնում։ 1984-1991 թվականներին սովորել է Մոսկվայի թատերական արվեստի պետական ինստիտուտի ռեժիսուրայի ֆակուլտետում։ 1985-1988 թվականներին եղել է «Պոպուլյար» ՎԳԱ-ի երաժիշտ։ 1992 թվականին նշանակվել է Հայաստանի Ազգային ֆիլհարմոնիկ գործակալության նախագահ, մինչ 1994 թվականը ղեկավարել է Հայաստանի պետական ջազ նվագախումբը։ 1994 թվականից հիմնադրել է Հայաստանի երգի պետական թատրոնը և եղել դրա գեղարվեստական ղեկավարը։ 1995-1998 թվականներին եղել է Երևանի Երիտասարդական պալատի տնօրենը։ 2001 թվականից հանդիսացել է Հայաստանի Հանրային հեռուստառադիոընկերության խորհրդի անդամ, 2009 թվականից՝ խորհրդատու։

Հեղինակել է «Այո», «777», «Ասուպ», «Ընծա» մրցանակաբաշխությունները, «Հենց այսպես», «Տես» հեռուստահաղորդումները, «Կանաչ գոտի», «Արցախի ձայներ» նախագծերը, Հայաստանի «Զաքյան» ֆոնդի հովանավորչական ամենամյա հեղինակ-կատարողների մրցանակաբաշխությունը։ Նախաձեռնել և ղեկավարել է Երևանի գեղարվեստա-թատերական ինստիտուտի էստրադային կուրսը։ Հեղինակել է բազմաթիվ երգեր, մանկական մյուզիքլներ, մասսայական միջոցառումներ, փառատոներ, թեմատիկ և էստրադային համերգներ:

Նշենք, որ մաեստրո Արթուր Գրիգորյանի դուստրը՝ Մանե Գրիգորյանն այժմ ղեկավարում է Երգի պետական թատրոնի ԺՊ պաշտոնը:

https://www.instagram.com/armenianstatesongtheatre/