ՄԵՐԻ ՍԱՐԻԿՅԱՆԻ ԾՆՆԴՅԱՆ ԱՆԱԿՆԿԱԼՆԵՐՆ ՈՒ ՀԱՅՏՆԻ ՀՅՈՒՐԵՐԸ

«Սովորաբար ծննդյանս օրը պահել եմ միշտ երազանք կոնկրետ ինձ համար, բայց այս տարի բացառություն էր։ Իմ երազանքն այս տարի կապված էր մեծ ու փոքր ընտանիքիս անդամների հետ։ Վերլուծելով այս իրողությունը՝ ինձ համար երկու փաստ արձանագրեցի՝ առաջինը ես ինձ լիարժեք եմ զգում և երկրորդ հասկացել եմ, որ իմ երջանկության ամենակարևոր մասը հենց հարազատներիս երջանկությունն է։Այս տարի բախտ վիճակվեց ծնունդս նշելու Երևանում`  հարազատ քաղաքում, հարազատ ընկերներիս հետ։ Թեև, իմ ծննդյան օրը միշտ էլ ինձ համար մեծ տոն է և 28 տարի պարտադիր նշել եմ որևէ կերպ, բայց այս տարի հատկապես ջերմառատ անցավ։ Ի սկզբանե, որոշել էի առանձնապես չնշել և ուղղակի մի քանի հարազատ մարդկանց հետ հանգստանալ Ծաղկաձորում, սակայն վերջին պահին պլանները փոխեց ամուսինս և այնպես ստացվեց, որ մի քանի փուլով նշեցինք։ Օրը սկսեցինք առավոտյան բրանչով։ Երևանյան գեղեցիկ սրճարաններից մեկում, հավաքվել էին իմ հին ու նոր լավ ընկերները։ Ես շատ ընկերասեր եմ և բարձր եմ գնահատում ընկերությունը, երևի թե հենց այդ պատճառով էլ ունեմ շատ ու շատ հավատարիմ ու լավ ընկերներ։ Ներկա էին նաև մայրս և դուստրս, ովքեր էլ հենց իմ ամենամտերիմ ընկերներն են։ Ի դեպ, մեկ օրում ենք կազմակերպել այս բրանչը, լրիվ սպոնտան, ամուսնուս խնդրանքով, ով շատ էր ցանկանում ծննդյանս օրը անակնկալ գալ Հայաստան, բայց աշխատանքային զբաղվածության պատճառով չէր հաջողվել և նա ամեն կերպ ինձ համոզեց, որ անպայման նշեմ, շրջապատեմ ինձ իմ սիրելի մարդկանցով, որպեսզի գոնե մի քիիիչ իր բացակայությունը լրացնեմ և ուրախ լինեմ այդ օրը։ Թեման ընտրեցի երկու րոպեում`  հիշելով լիմոններով զգեստիս մասին :))), իսկ Vivi event group-ը ինձ օգնեց արագ կազմակերպել համապատասխան դիզայն։ Բրանչից հետո տեղափոխվեցինք Ծաղկաձորի Էլեգանտ հյուրանոցը, որտեղ էլ շարունակեցինք մեր տոնը։ Շատ եմ սիրում նվերներ տալ և ստանալ։ Ամենից շատ սիրում եմ ծաղիկներ և այս մասին գիտեն մտերիմներս․ այս պահին մեր տունը լրիվ ծաղիկների պուրակի է վերածվել։ Ամուսինս , ցավոք, առաջին անգամ հեռու էր գտնվում ինձնից ֆիզիկապես, բայց նրա ներկայությունը միևնույն է զգում էի կողքիս։ Կեսգիշերին ամենաառաջինը նա ինձ շնորհավորեց և հենց այդ պահին, երբ խոսում էինք, դուռը թակեցին և բերեցին ամուսնուս անակնկալ`  շատ գեղեցիկ ծաղկեփունջ, իսկ ամուսնուս կողմից նվերը սկեսուրս փոխանցեց ինձ, ով այսօր է ժամանել Երևան։ Երևի թե հենց ամուսնուս նվերն էլ ամենահիշարժանն է միշտ լինում ինձ համար, քանի որ միշտ խնամքով ու սիրով է պատրաստում։ Իսկ ամենաթանկ նվերը, իհարկե, ծնողներիս նվերն է հավետ, ովքեր ինձ կյանք են նվիրել։ Ամենահաճելի բարեմաղթանքները հետևորդներիս բարեմաղթանքներն էին, ովքեր ցանկանում էին, որ միշտ մնամ էներգիայով և լույսով լի, որպեսզի շարունակեմ իրենց ջերմացնել և մոտիվացնել։ Սա թերևս մեծ ձեռքբերում է ինձ համար, քանի որ մարդկանց որևէ կերպ դրական լիցքեր հաղորդելը, օգտակար լինելը, համարում եմ իմ առաքելություններից մեկը կյանքում, և միայն այդ միտքը, որ ինչ-որ չափով դա ինձ հաջողվում է, ջերմացնում է սիրտս։ Շնորհակալ եմ բոլորին շնորհավորանքների և բարեմաղթանքների համար»: