«Արմենիա Վայն» ընկերության բացառիկ նմուշի՝ «V&M» հայկական կոնյակի շնորհանդեսը

Նոյեմբերի 25-ին՝ Ալեքսանդր Սպենդիարյանի անվան օպերայի և բալետի ազգային ակադեմիական թատրոնում , տեղի ունեցավ «Արմենիա Վայն» ընկերության բացառիկ նմուշի՝ «V&M» հայկական կոնյակի շնորհանդեսը. միաձուլվեցին կոնյակն ու բալետը․ ներկաներն առաջին անգամ վայելեցին «Արմենիա Վայն» ընկերության 10 տարվա աշխատանքի արդյունքը և «Կարապի լիճը» բալետը։

«V&M» ձեռակերտ կոնյակը Վարդանյան եւ Մկրտչյան ընտանիքների՝ հայրենիքի հանդեպ սիրո, նվիրումի եւ հոգատարության մարմնացումն է, այն 10 տարի հնացել է Արամ Խաչատրյանի հանճարեղ մեղեդու ներքո։

Ավելի քան 15 տարի գործունեություն ծավալելով հայկական և համաշխարհային շուկայում և զբաղեցնելով առաջատար դիրքեր՝ «Արմենիա Վայն» ընկերությունը հանրությանը վերջապես ներկայացավ կոնյակով, որը Հայաստանն աշխարհին նորովի ներկայացնելու բացառիկ նմուշ է։Կան արժեքներ, որոնք չեն ճանաչում ժամանակի եւ տարածության սահմաններ, հենց այդ արժեքներն էլ դառնում են դասական ու մշտապես արդիական։ Այդպիսի արժեքներից է «V&M» հայկական կոնյակը, սիմֆոնիա՝ ստեղծված հայկական եւ ֆրանսիական կոնյակագործության լավագույն ավանդույթների միաձուլումից։

«V&M» կոնյակն իրապես անկրկնելի է իր էությամբ։ Նրա մեջ ամփոփված են հայկական տերուարի համային և բուրային բոլոր առանձնահատկությունները, որոնք այնքան ներդաշնակորեն միախառնվել են ֆրանսիական տեխնոլոգիաների հետ։ Որպես կարևորագույն և որոշիչ նոտա՝ հայկական կոնյակը հնացրել են ֆրանսիական 80-100 տարեկան կաղնեփայտե տակառներում։

Տարիներ շարունակ գինեգործության ոլորտում բարձր նշաձող սահմանելելով ՝ ընկերությունն այժմ սկսում է հայկական կոնյակագործության բացառիկ շրջան՝ պատմելով աշխարհին Հայաստանի մասին՝ կոնյակի բույրով։